1. திருப்பலி நேரத்தில் புனிதம் செய்ய விரும்பின், முன் குறிப்புகளையும் சடங்குகளையும் வாசகங்களையும் 'கோயிலையும் பீடத்தையும் நேர்ந்தளிக்கும் சடங்குமுறை` என்னும் புத்தகத்தில் பக்.153-157 காண்க.
2. திருப்பலிக்குப் புறம்பே மந்திரிக்கும் சடங்குமுறை இங்குத் தரப்பட்டுள்ளது. மக்களுக்கு முன் நிறைவேற்றுவது சிறப்பு.
3. இவை நற்கருணைக் கொண்டாட்டத்திற்கு மட்டும் நிலையாக ஒதுக்கப்படுவதால் 'புனித பாத்திரங்கள்' ஆகின்றன.
4. திருக்கிண்ணத்தையும் திருத்தட்டையும் எந்தக் குருவும் புனிதம் செய்யலாம். ஆனால் திருப்பலிப் புத்தகத்தின் பொதுப் போதனை (எண் 290-295) தரும் விதிகளுக்கொப்ப அவை உருப்பெற்றிருக்க வேண்டும்.
குரு: தந்தை, மகன், தூய ஆவியின் பெயராலே
எல்: ஆமென்.
குரு: நம் மீட்புக்காகத் தம் உடலையும் இரத்தத்தையும் அளித்த நம் ஆண்டவர் இயேசு கிறிஸ்துவின் அருளும், கடவுளின் அன்பும். தூய ஆவியின் நட்புறவும் உங்கள் அனைவரோடும் இருப்பதாக.
எல்: உம்மோடும் இருப்பதாக
அருள்வாக்கு : 1 கொரி.11:23-26
ஆண்டவரிடமிருந்து நான் எதைப் பெற்றுக்கொண்டேனோ அதையே உங்களிடம் ஒப்படைக்கிறேன். அதாவது ஆண்டவராகிய இயேசு காட்டிக் கொடுக்கப்பட்ட அந்த இரவில், அப்பத்தை எடுத்து, கடவுளுக்கு நன்றி செலுத்தி, அதைப் பிட்டு, "இது உங்களுக்கான என் உடல். என் நினைவாக இவ்வாறு செய்யுங்கள்" என்றார். அப்படியே உணவு அருந்தியபின் கிண்ணத்தையும் எடுத்து, "இந்தக் கிண்ணம் என் இரத்தத்தால் நிலைப்படுத்தப்படும் புதிய உடன்படிக்கை. நீங்கள் இதிலிருந்து பருகும்போதெல்லாம் என் நினைவாக இவ்வாறு செய்யுங்கள்" என்றார்.
இது ஆண்டவர் வழங்கும் அருள்வாக்கு.
பதிலுரைப்பாடல் : திபா. 16:5, 8 -11
பல்லவி: ஆண்டவர்தாமே என் உரிமைச் சொத்து; அவரே என் கிண்ணம்.
1. எனக்குரிய பங்கைக் காப்பவரும் அவரே. ஆண்டவரை எப்போதும் என் கண்முன் வைத்துள்ளேன்; அவர் என் வலப்பக்கம் உள்ளார்; எனவே, நான் அசைவுறேன். - பல்லவி
2. என் இதயம் அக்களிக்கின்றது; என் உள்ளம் மகிழ்ந்து துள்ளுகின்றது; என் உடலும் பாதுகாப்பில் நிலைத்திருக்கும். ஏனெனில், என்னைப் பாதாளத்திடம் ஒப்புவிக்கமாட்டீர்: உம் அன்பனைப் படுகுழியைக் காண விடமாட்டீர். - பல்லவி
3. வாழ்வின் வழியை நான் அறியச் செய்வீர்; உமது முன்னிலையில் எனக்கு நிறைவான மகிழ்ச்சி உண்டு; உமது வலப்பக்கத்தில் எப்போதும் பேரின்பம் உண்டு. - பல்லவி
(குரு மறையுரை ஆற்றலாம்.)
(பின்பு பணியாளர்கள் அல்லது திருக்கிண்ணத்தையும் திருத்தட்டையும் அளிக்கின்றவர்கள் அல்லது அவர்களின் பிரதிநிதிகள் அவற்றைப் பவனியாகக் கொணர்ந்து பீடத்தின்மேல் வைப்பர். அப்போது பாடப்படும் பல்லவி:)
மீட்புக்காக நன்றி கூறி, கிண்ணத்தைக் கையில் எடுத்து ஆண்டவருடைய திருப்பெயரைக் கூவியழைப்பேன்.
(பின்பு கைகளை விரித்துக் குரு சொல்வதாவது:)
குரு: மன்றாடுவோமாக:
எங்கள் அன்புத் தந்தையே, இக்கிண்ணத்தையும் அப்பத் தட்டையும் மகிழ்ச்சியோடு இப்பீடத்தின்மீது வைத்து நிற்கும் உம் மக்களைக் கனிவுடன் கண்ணோக்கியருளும். உம்முடைய மக்களின் ஒருமித்த விருப்பத்தால், புதிய உடன்படிக்கையின் திருப்பலியைக் கொண்டாட மட்டும் பயன்படும் இப்பாத்திரங்களை ✠ ஆசீர்வதித்துப் புனிதப்படுத்தியருளும். இவ்வுலகில் திருப்பலி நிகழ்த்தி, திருவருட் சாதனங்களால் ஊட்டம் பெறும் நாங்கள் வானுலகில் புனிதர்களோடு உமது திருவிருந்தை அருந்தும்வரை தூய ஆவியினால் நிரப்பப்பெற அருள்புரியும். புகழும் மாட்சியும் என்றென்றும் உமக்கே உரியனவாகுக.
எல்: இறைவன் என்றென்றும் வாழ்த்தப்பெறுவாராக.
பொது மன்றாட்டுகள்
(இம் மன்றாட்டுகளைத் திருப்பலியிலும் பயன்படுத்தலாம்.)
குரு: உயிர்தரும் உணவாகவும் மீட்பளிக்கும் கிண்ணமாகவும் தம்மையே திருச்சபைக்கு இடைவிடாது கையளிக்கின்ற நம் ஆண்டவர் இயேசுவை வேண்டுவோம்.
பதிலுரை: வானக அப்பமே, எமக்கு வாழ்வளித்தருளும்.
1. எங்கள் மீட்பரே, தந்தையின் திருவுளத்திற்குப் பணிந்து, பாடுகளின் கிண்ணத்தில் பருகி எங்களை ஈடேற்றினீர். நாங்கள் உமது மரணத்தின் மறைபொருளில் பங்கேற்று, வானகம் வந்து சேரச் செய்தருளும்.
2. உன்னத கடவுளின் குருவே, நீர் திருப்பீடத்தின் அருட்சாதனத்தில் எழுந்தருளியிருக்கின்றீர், அப்பிரசன்னத்தை நாங்கள் விசுவாசத்தால் கண்டுணரச் செய்தருளும்.
3. எங்கள் நல்லாயனே, சீடருக்கு உம்மையே உணவும் பானமுமாக அளித்தீர். உம்மை உட்கொண்டு நிறைவு பெற்ற நாங்கள் உமது சாயலாக உருமாறச் செய்தருளும்.
4. இறைவனின் செம்மறியே, அப்ப இரச வடிவில் பாஸ்கா மறைபொருளைக் கொண்டாட உமது திருச்சபைக்குப் பணித்தீர். இறைமக்கள் அனைவருக்கும் திருப்பலி ஞானவாழ்வின் ஊற்றாகவும் கொடுமுடியாகவும் இருக்கச் செய்தருளும்.
5. இறைவனின் திருமகனே, வாழ்வளிக்கும் அப்பத்தையும் மீட்பளிக்கும் பானத்தையும் எங்களுக்கு நிறைவாகத் தந்து, உம்மீது உள்ள பசியையும் தாகத்தையும் வியத்தகு வகையில் தணிக்கிறீர். இதனால் நாங்கள் இறையன்பிலும் பிறரன்பிலும் வளர்ந்திடச் செய்தருளும்.
இயேசு கற்பித்த செபம்
குரு: சகோதரரே. நமது வேண்டுதல் கிறிஸ்துவின் செபத்தால் உச்சநிலை அடைகிறது. ஏனெனில் அவர் சிலுவையில் அறையுண்டு மீட்பின் இணைப்பாளரானார். தந்தையின் திருவுளத்தை நிறைவேற்றிச் செபத்தின் ஆசிரியரானார். எனவே, அவரோடு சேர்ந்து அவரது செபத்தைச் சொல்வோம்.
எல்: பரலோகத்திலிருக்கிற ...
இறுதி செபம்
குரு: இறைவா, உம் திருமகனின் இறப்பினாலும் உயிர்ப்பினாலும் மக்கள் அனைவரையும் மீட்டருளினீர். இரக்கம் மிகுந்த உமது மீட்புச் செயல் எங்களில் நிலைத்திருப்பதாக. இவ்வாறு நாங்கள் கிறிஸ்துவின் மறைபொருளை இடைவிடாது நினைவுகூர்ந்து, எங்கள் மீட்பின் பலனை அடையச் செய்தருளும். உம்மோடு என்றென்றும் வாழ்ந்து ஆட்சி செய்கின்ற அவர் வழியாக உம்மை மன்றாடுகிறோம்.
எல்: ஆமென்.
ஆசியுரை
குரு: ஆண்டவர் உங்களோடு இருப்பாராக.
எல்: உம்மோடும் இருப்பாராக.
குரு: எல்லாம் வல்ல இறைவன் தந்தை, மகன், தூய ஆவி உங்கள் அனைவரையும் ஆசீர்வதிப்பாராக.
எல்: ஆமென்.
குரு: கிறிஸ்துவின் அமைதியில் சென்று வாருங்கள்.
எல்: இறைவா, உமக்கு நன்றி.
